Estimado señor presidente Pedro Sánchez,

Diversas persoas do mundo da cultura unímonos para trasladarlle a nosa profunda preocupación pola grave situación de opresión e violencia que padece o pobo palestino baixo o xenocidio e o réxime de apartheid e ocupación israelí. Como persoas comprometidas cos valores de xustiza, paz e dereitos humanos, sentimos a responsabilidade de alzar as nosas voces contra as inxustizas que perpetúan o sufrimento da poboación palestina.

Pedímoslle que tome medidas urxentes para impoñer un embargo integral de armas a Israel. Os embargos de armas son unha medida poderosa para apoiar o mantemento da paz e demostraron ser efectivos en moitos contextos. Foron unha ferramenta fundamental para poñer fin ao apartheid en Sudáfrica. Sabemos que está nas súas mans. Non é só un imperativo moral, senón tamén unha obriga de acordo co dereito internacional.

Levamos xa demasiados meses observando con horror as masacres que Israel comete cada día. A provisión de armamento e munición desde España, o tránsito de armas e combustible militar polo noso territorio e a compra de material militar contribúen a perpetuar a ocupación e financian un xenocidio contra o pobo palestino, incrementando a perda de vidas e o sufrimento de civís.

A nivel internacional, España destacou como un país que se posicionou a favor da paz e do pobo palestino. Pero isto non basta. Mentres España manteña relacións militares con Israel, seguirá sendo cómplice desta masacre. A poboación do Estado español leva meses saíndo á rúa e esixindo medidas ao seu Goberno. Debe escoitar ao pobo que non quere ser cómplice desta barbarie.

Un Goberno como o que vostede preside, que se define como progresista e busca liderar a defensa dos dereitos humanos e o dereito internacional a nivel global, debe facer aínda máis polos dereitos do pobo palestino e do pobo libanés. España pode sumar a súa voz á de outras nacións que xa detiveron o comercio de armas con Israel, converténdose así nun faro de luz nunha época de tanta escuridade.

O pobo palestino leva décadas soportando ocupación, desprazamento e violacións sistemáticas dos seus dereitos fundamentais. É responsabilidade da comunidade internacional, incluída España, non ser cómplice, nin directa nin indirectamente, deste réxime de opresión. O embargo de armas é unha acción concreta e urxente para frear a violencia desmedida e contribuír a unha solución xusta.

Confiamos en que adopte unha postura valente e coherente, e que apoie os esforzos internacionais que procuran unha paz duradeira baseada na xustiza e no respecto aos dereitos humanos. A historia xulgaranos polas nosas accións en momentos críticos como este. Non podemos seguir permitindo que Israel leve consigo máis vidas palestinas. Poñamos fin a este horror.

Agardamos unha resposta pronta e firme a esta petición, que reflicte o desexo de construír un futuro onde se respecten os dereitos e a dignidade de todos os pobos.